Слово 68 «Поучение в неделю 22 по сошествии Святаго Духа, яко зле богатящиися на вечныя муки отходят и во аде несть помилования, а нищета благодарно приемлема вечнеи радости сподобляет» (сборник проповедей «Статир», последняя четверть XVII в.) — Богатство (Россия)

Извлечение

Якоже бо в пустыни несть лютейша лва и медведя, тако и во градех несть злейше сребролюбиваго и лихоимца. Оныя бо похищают и растерзают тогда, егда пищи алчут. Лихоимец же не имать покою, похищая, и во брании сытости не ощущает, елико ся ему злато умножает, толико он желание свое простирает. Ад и погибель никогда ся наполняет, тако и сребролюбивая душа никогда же доволна бывает. Ибо лихоимец, всея вселенныя враг, родителский наветник, Богу ратник, церковный оглаголник, нищим наветник, корчемником друг, пияницам похвалник, блудницам потворник, разбойником приемник, убийству советник. О богатых бо послушати вси прилежни, понеже вем, что всякому в богатстве жити полезно является. Нищета же тяжко есть зрети, яко лютую и студеную зиму мнети. Богатство бо на мале веселит, но на вечное згорение отсылает. Нищета же аки пешь человека объемлющи спекает, но в неизреченныя прохлаждения отсылает. Но обаче человецы малочасному веселию болше изволяют, а о превечном упокоении малии внимают, многим добро ся мнит всегда веселити, в преизобилном богатстве жити, в красных и светлых ризах ходити, многими ся и сладкими брашны питати, и вино з благовонными ароматы пити, музыками и органы слуха своя наслаждати, рабов множество имети, тунеядцов и ласкателей бесчисленно – сие зело любезно человеком. Нищету же окаявают и проклятым человека нищаго нарицают, и богоненавистным глаголяще: «Яко Бог ненавидит сего человека, иже попусти ему в толикую нищету впасти. Ныне же ясно сия показав, глаголя: «Бысть же умрети нищему и несену быти ангелы на лоно Авраамле» (Лк. 16:22). Зрите, возлюбленнии, нищета что ходатайствует, ея же мнози гнушаются. Не к тому уже пси окружают его, но небеснии ангели служат ему, вместо предверия богатаго восприят Небо пресветлое, вместо гноища мягкое лоно Авраамле, вместо червия и гноя облечеся в ризу световидную вечнаго бесмертия, вместо последней нищеты обогатися бесчисленными небесными богатствы, вместо желающей крупицы насытися пищи присноживотныя, хлеба небеснаго, ангелом возжеланныя. Еще ли, возлюбленнии, непотребна вам мнится быти нищета, но услышите и вожжеленное вами богатство и маловременное веселие не от моих худых словес, но от Самаго Спасителя пресвятейших устъ: «Умре же, – рече, богатый и погребен бысть, и во аде возвед очи сый в муках и, узрев Авраама издалеча и Лазаря в недрех его, и той, возгласив, рече: «Отче Аврааме, помилуй мя и посли Лазаря, даже омочит конец перста своего в воде и прохладит язык мой, яко стражду в пламени семъ» (Лк. 16:22–24). Оле, проклятаго богатства и возжеления несыта: в мале времяни насыщаяся, вовеки взалка. Увы погибели богатаго и немилостиваго, вся благая отбегоша, точию злая вечная постигоша, вместо порфиры пламенем неугасимым обьят, вместо палат превысоких в темном аде затворися, вместо безвременнаго смеяния плач неутишимый, рыдание и стенание горкое, беспрестанных слез пролитие. Вместо рабов бесове служат, вместо веселия плачь нестерпимый и ужас. И просто рещи: от всех красных мiра сего наг и пусть остася, точию взирает ис преисподних на высоту, возводит очи своя ис тмы к свету. Отсюду богатый сугубую претерпевает муку. Понеже бо иногда Лазаря презираше, пред враты своими на гноищи поверженна, гноем оструплена, червми снедена, в наготе померзающа и гладом погибающа, но токмо пси служаху ему. Услышите, богатии, и накажитеся, немилостивии. Иже неточию не милуете и нищих презираете, но и чужая похищаете, бедных насилующе, сиротам и вдовицам слезы проливаете. Ты имаши тысящу овец, а у убогаго и малое агня поемлеши, да не таяждо, и вы постраждете, яко же и сей богач. Он бо аще и чюжая не похищаше, но от своих не миловаше и бесловесно наслаждаяся, сего ради молитъ: «Отче Аврааме, помилуй мя, и посли Лазаря, да омочит перст свой в воде и ухладит язык мой» (Лк. 16:22–24). Ибо и сей богатый молися страннолюбивому Аврааму, но милости не получи. Что же ради не к Лазарю простирает слово, но ко Аврааму? Прежде бо Лазаря гнушашеся нищеты его. Ныне же стыдится славы и красоты его, паче же снедаем от своея совести, яко к Лазарю являшеся немилостив, мня его и к себе, тако же зло помняща. Глаголет блаженный Феофилакт: «От своих разсуждаше богатый и мня Лазаря, аще бо аз насыти вся благоденства, презрех его, в толиких злых утесняема, ни крупиц подах ему. Всяко зло попомнит и возрит не дати. Зрите патриархову кротость, не рече: «О, немилосерде, сам не помиловал, еси да милости просишь, почто не срамляешися? Малой капли просити, а насыщался еси толиких брашен и питий. Был еси бестуднее псов и горши, они бо Лазарю милость являху, облизающе гной его.

Выделенные понятия: наведите, нажмите или выберите с клавиатуры для комментария

История текста

Извлечение

Библиография

I. Источник

II. Исследования